DÍA MUNDIAL DO MEDIO AMBIENTE​

O 5 de xuño é a data elixida pola  ONU para celebrar o Día Mundial do Medio Ambiente, reunindo nunha plataforma global a gobernos, empresas e cidadáns en torno ao tema central do Ambiente.

Celébrase dende 1974 e cada ano un país actúa de anfitrión  (España foi no 2004 co tema O mar e os océanos e co lema:  “¡Se buscan! Mares y océanos-¿Vivos o muertos?”) .

Neste 2021 o país anfitrión é Pakistán co tema: Restauración de ecosistemas e co lema “Reimaxina, recupera, restaura”, esixindo accións urxentes para devolver a vida aos nosos ecosistemas danados.

Previr, deter e reverter este dano é unha misión global para revivir millóns de hectáreas, dende bosques ata terras de cultivo, dende a cima das montañas ata as profundidades do mar. So con ecosistemas saudables podemos mellorar o medio de vida das persoas (acceso a auga potable e alimentos), contrarrestar o cambio climático e deter o colapso da biodiversidade.

É a nosa responsabilidade, polo tanto:

• Reduce, recicla e reutiliza (papel, plástico e outros materiais).
• Separa o lixo orgánico do inorgánico.
• Utiliza a auga racionalmente (cerra billas e controla fugas).
• Aproveita a luz natural e reduce o consumo de enerxía eléctrica (apaga as luces e desenchufa o que non esteas utilizando).
• Utiliza pilas e baterías recargables.
• Consume froitas, vexetais e verduras que non conteñan fertilizantes nin outros produtos contaminantes.
• Non abuses da calefacción nin do aire acondicionado.
• Prioriza o uso da bicicleta ou camiña.
• Planta unha árbore ou plantas silvestres.
• Cando saias a pasear pola natureza leva unha bolsa e recolle o lixo que atopes.
• Dona ou regala o que non necesites: roupa, libros, xoguetes …
• Non mates insectos nin outros animais, cada un ten a súa función na natureza.
• Ensina ás túas fillas/os que o Medio Ambiente necesita da nosa axuda e colaboración